जनकपुरधाम । चुनाव नजिकिएपछि उम्मेदबार बन्न चाहनेहरु जनता माझ दौडधूप गर्न थाल्छन् । कोहि सडक बनाइदिने, त कोहि जागिर लगाइदिने, त कोहि बिभिन्न किसिमको विश्वास जनतालाई दिलाउन थाल्छन् । तर, सधैं जनताको बीचमा रहिरने पात्र पनि केहि छन् । जनप्रतिनिधी नहुँदा पनि सधैं जनताकै बीचमा रहने दीपेन्द्र यादव यस पटक जनप्रतिनिधी बन्ने दौडमा सहभागी भएका छन् ।
यादव धनुषाको कमला नगरपालिकाको मेयर पदमा उम्मेदबारी दिएका छन् । ‘सधैं जनताको बीचमै रहेको छु । हरेकको सुखदुःखमा प्रत्यक्ष रुपमा सहभागी भएको छु’ उनी भन्छन्, ‘त्यहीं भएर जनताले विकास गर्ने ठाउँमा पुगाउँछन् ।’
यादव नेकपा एमालेबाट मेयर पदमा उम्मेदबारी दिएका छन् । जनता आफ्नो पक्षमा रहेको भन्दै उनी यस पटक कमलाको विकास गर्नका निम्ति आफूलाई नै अघि सार्ने बताउँछन् ।
‘यहाँको स्वास्थ्य, शिक्षा अत्यन्तै कमजोर छ । सडकहरुको बेहाल छ । बर्षाको समयमा जनतालाई बाढीमै दिन काटनुपर्ने बाध्यता छ’ उनी भन्छन्, ‘विगतका जनप्रतिनिधीले यसतर्फ कुनै चासो नै दिएनन् । जनताले यी काम आफूबाट हुने विश्वास लिएका छन् ।’
आफू जितेमा यी समस्याको समाान गर्दै बेरोजगार युवालाई रोजगारीको अवसर खोजी गरिदिने, नगरभित्रका उद्योग, व्यवसायीलाई प्रोत्साहित गर्ने, एक घर एक रुखको अभियान शुरुवात गर्ने, प्रत्येक वडाका बजारको उचित व्यवस्थापन गर्ने उनको भनाई छ ।
सरकारी विद्यालयहरुको अवस्था लथालिंग रहेको भन्दै उनी हरेक विद्यालयको शिक्षालाई गुणस्तरीय बनाउने बताए । स्वास्थ्य केन्द्रलाई व्यवस्थि तगर्दै चिकित्सक र उपकरण थपेर जनतालाई यहीं स्वास्थ्य सेवा उपलब्ध गराउने उनको भनाई छ ।