सिरहा । सिरहाका सबै नगरपालिकालाई उछिन्दै मिर्चैया नगरपालिका कार्यसम्पादनमा पहिलो बनेपछि नगरप्रमुख श्रवणकुमार यादव सम्मानित भएका छन् ।
सिरहाका ८ वटा नगरपालिकामध्ये मिर्चैया नगरपालिका पहिलो बनेपछि मेयर यादवलाई सम्मान गरिएको हो । उनलाई मिर्चैयामा अवस्थित स्वस्तिक पाठशालाले सोमबार एक कार्यक्रम गरी सम्मान गरेको हो ।
संघीय मामिला तथा सामान्य प्रशासन मन्त्रालयअन्तर्गत् स्थानीय तह संस्थागत क्षमता स्वमूल्यांकन (लिजा) प्रणालीमा तोकिएका १० वटा विषय क्षेत्रमा कुल एक सय अंकमध्ये मिर्चैया नगरपालिकाले ८८.७५ अंक प्राप्त गरेको छ ।
यो भनेको सिरहाका ८ वटै नगरपालिकामध्ये सबैभन्दा धेरै हो । स्थानीय तहको दोस्रो निर्वाचन भएयता पहिलो आर्थिक वर्ष ०७९/८० को नतिजा केही समयअघि मात्रै सार्वजनिक भएको थियो ।
नगरप्रमुख यादवले सम्मान कार्यक्रमलाई सम्बोधन गर्दै यो आफ्नो र आफ्नो टिमको ‘हार्डवर्क’को परिणाम भएको बताएका छन् । उनले मिर्चैयालाई नमुना नगरपालिका बनाउने आफ्नो अभियानमा अहोरात्र खट्ने कर्मचारी र जनप्रतिनिधिहरूप्रति आभार पनि प्रकट गरे ।
‘म जनतालाई सर्वोपरि ठानेर, जनताको सुख-सुविधालाई सर्वोपरि ठानेर अगाडी बढिरहेको छु,’ उनले भने, ‘यसैको परिणाम हो यो, मेरो यो महाअभियान अविरल जारी रहन्छ ।’ मिर्चैया नगरपालिका समृद्धि र सुशासनका सवालमा गुरुयोजना बनाएर अघि बढेको पनि उनले सुनाए ।
